ڕشانەوە یەکێکە لە کاردانەوە بێزارکەرەکانی لەش بۆ دەرکردنی ناوەڕۆکی گەدە، ئەمەش بە هۆکاری جۆراوجۆرەوە دروست دەبێت وەک ژەهراویبوونی خۆراک، هەوکردنی ڤایرۆسی، کێشەی هەرس، سەرئاسێ، یان تەنانەت فشاری دەروونی. چارەسەری ڕشانەوە پەیوەستە بە هۆکاری بنەڕەتییەوە، هەر بۆیە ناکرێ شێوازێکی چارەسەری دیاریکراو بۆ هەموو کەسێک پێشنیار بکرێت تاوەکو هۆکارەکەی دیاری نەکرێت.
لە زۆربەی حاڵەتەکاندا ڕشانەوە و سکچوون بە پشوودان و خواردنی شلەی پێویست و چارەسەری هۆکاری بنەڕەتی باشتر دەبێت، بەڵام ئەگەر توند بوو، درێژخایەن بوو یان نیشانەکانی وەک بەرزبوونەوەی تا، خوێن لە ڕشانەوە، ئازاری توندی سک یان وشکبوونەوەی لەشی لەگەڵدا بوو، پێویستە بە زووترین کات سەردانی پزیشک بکەیت.
هۆکارەکانی ڕشانەوە و سکچوون چین؟
ڕشانەوە نەخۆشی نییە، بەڵکو نیشانەیەکە کە نیشان ئەدات جەستە تووشی کێشەیەک بووە. ئەم کێشەیە ڕەنگە تەواو سادە و کاتی بێت، وەک زیادەڕۆیی لە خواردن یان ژەهراویبوونی خۆراک، یان ڕەنگە بەهۆی نەخۆشییەکی قورسترەوە بێت. هەر لەبەر ئەم هۆکارە هەنگاوی یەکەم بۆ چارەسەرکردنی ڕشانەوە ئەوەیە کە بزانین هۆکاری ڕشانەوەکە چییە. لێرەدا، دەتوانن باوترین هۆکارەکانی ڕشانەوە ببینن.
- ژەهراوی بوونی خۆراک
- هەوکردنی ڤایرۆسی گەدە و ڕیخۆڵەکان
- دووگیانی بەتایبەت لە سێ مانگی یەکەمدا
- گەڕانەوەی گەدە و سورێنچک
- برینی گەدە یان هەوکردنی گەدە
- سەرئاسێ
- فشاری دەروونی، دڵەڕاوکێ یان هێرشی ترس
- نەخۆشیەکانی جگەر، کیسە سەفرا یان پەنکریاس
- خواردنی هەندێک دەرمان وەک دژە زیندەیی و دەرمانی چارەسەری کیمیایی و ئازارشکێنی بەهێز
- نەخۆشی جوڵە لەکاتی گەشتکردن بە ئۆتۆمبێل، کەشتی یان فڕۆکە
- هەوکردنی ناوەوەی گوێ و تێکچوونی هاوسەنگی
بێگومان بە هۆکارگەلێکی تریشەوە ڕشانەوە ڕوودەدات، بەڵام ئەمانە باوترین و گرنگترین هۆکارن.
شێوازەکانی چارەسەری دەستبەجێ بۆ ڕشانەوە
هەرچەندە چارەسەری ڕشانەوە یان سکچوون بەندە بە هۆکارەکەیەوە و پێویستە لە ڕەگەوە چارەسەری کێشەکە بکەیت. بەڵام دەکرێ توندی سکچوون و ڕشانەوە کەم بکەیتەوە بە پشوودان و قەرەبووی ئاوی لەدەستچووی لەش و خواردنی دەرمان.
هەروەها بخوێنەوە: چارەسەری قەبزی لە منداڵ و گەورەساڵاندا
دەرمانی ڕشانەوە
ئەگەر ڕشانەوەکە توند بوو، لەوانەیە پزیشکەکەت دەرمانی دژە سکچوون و دژە ڕشانەوە وەک ئۆندانسترۆن، میتۆکلۆپرامید یان دۆمپێریدۆن بنووسێت. ئەم دەرمانانە پێویستە بە ئامۆژگاری پزیشک یان دەرمانساز بخورێت.
چارەسەری ماڵەوە بۆ ڕشانەوە
لە زۆربەی حاڵەتەکاندا، ڕشانەوەیەکی سووک بە چاودێریکردنی لە ماڵەوە باشتر دەبێت. خواردنەوەی دڵۆپ دڵۆپی ئاو یان گیراوەی ORS، پشوودان، دوورکەوتنەوە لە خۆراکە چەور و قورسەکان و دەستکردن بە خواردنی خۆراکی سووک وەک برنج، شۆربا یان نان یارمەتیدەر دەبێت بۆ کەمکردنەوەی نیشانەکانی نەخۆشییەکە.
چارەسەری گیایی بۆ ڕشانەوە
هەندێک گیا وەک زەنجەفیل و نەعنا و بابۆن یارمەتی کەمکردنەوەی سکچوون و ڕشانەوە دەدەن. بێگومان ئەم ڕێگایانە بۆ ڕشانەوەیەکی سووک کاریگەرترن و نابێت پشتیان پێ ببەسترێت ئەگەر نیشانەکانی ڕشانەوە توند بوون.
قەرەبووی ئاوچنیانی لەش
ڕشانەوەی بەردەوام دەبێتە هۆی لەدەستدانی ئاو و خوێ لە جەستەدا. لەبەر ئەم هۆکارە گرنگە بڕێکی کەم لە شلەمەنی زۆر بخۆیتەوە، یان گیراوەی ORS بەکاربهێنیت.
چارەسەری ڕشانەوە لە کاتی دووگیانیدا
سکچوون و ڕشانەوە یەکێکە لە باوترین کێشەکان لەکاتی دووگیانیدا بەتایبەت لە سێ مانگی یەکەمدا و بەزۆری بەهۆی گۆڕانی هۆرمۆنەکانەوە دروست دەبێت. باشتر وایە ژەمەکان بچووکتر و زووتر بکرێتەوە و خۆت دوور بخەیتەوە لە خواردنە چەور و بەهاراتییەکان و بە درێژایی ڕۆژ شلەمەنیەکان زۆرتر بخۆیتەوە. هەروەها خواردنی بڕێکی کەم لە زەنجەفیل یان خواردنی بسکیتێکی سادە پێش ئەوەی لە جێگاکە هەڵسیت، یارمەتیدەرە بۆ کەمکردنەوەی سکچوون.
دوور بکەوەرەوە لە خواردنی هەر جۆرە دەرمانێکی دژە سکچوون لە کاتی دووگیانیدا مەگەر پزیشکەکەت بۆت بنوێنێت. هەروەها ئەگەر ڕشانەوە ئەوەندە توند بوو کە ببێتە هۆی دابەزاندنی کێش، کەمئاوی لەش، یان نەتوانین لە خواردن و خواردنەوەدا، پێویستە بە زووترین کات سەردانی پزیشک بکەیت.
چارەسەری ڕشانەوە لە منداڵدا
زۆرجار ڕشانەوە لە منداڵاندا بەهۆی هەوکردنی ڤایرۆسی، ژەهراویبوونی خۆراک یان کێشەی هەرسکردنەوە، سەرهەڵدەدات. گرنگترین شت بۆ چارەسەری ئەم کێشەیە، ڕێگریکردنە لە کەمئاو بوونی جەستەی منداڵ. بۆ ئەم مەبەستە دەتوانن ئەم ڕێوشوێنانە بگرنەبەر:
- هەر چەند خولەکێک و جارێک بڕێکی کەم ئاو یان گیراوەی ORS بدە بە منداڵ و لە خواردنەوەی بڕێکی زۆر شلە بە یەکجاری دووری بخەنەوە.
- دوای وەستانی سکچوونەکە دەست بە خواردنی خۆراکی سوک بکەن وەک شۆربا، برنج و سووپ، سێو یان مۆز.
- دووری بکەوەرەوە لە خواردنی چەور و سورکراوە و شیرین و خواردنەوە گازدارەکان تا چاکبوونەوەی تەواو.
- دەرمانی دژە سکچوون بۆ منداڵان بە بێ ڕەچەتەی پزیشک بەکارمەهێنە.
هەروەها بخوێنەوە: هۆکار و چارەسەری ئازاری گوێ منداڵان
ئەگەر منداڵەکە تەمەنی لە ٦ مانگ کەمترە و ڕشانەوەکەی زۆر بوو، هەروەها نیشانەکانی کەمئاوی جەستەی وەک کەمبوونەوەی میزکردن و بەرزبوونەوەی تای لەگەڵدا بوو، پێویستە بە زووترین کات لەلایەن پزیشکەوە پشکنینی بۆ بکرێت.
کەی پێویستە بۆ ڕشانەوە سەردانی پزیشک بکەیت؟
بەزۆری ڕشانەوەیەکی سووک بە پشوودان و خواردنی شلەمەنیەکان باشتر دەبێت، بەڵام ئەگەر توند بێت و نیشانەی نائاسایی لەگەڵدا بێت، ئەوا مەترسیدار دەبێت. باشتر وایە بە زووترین کات سەردانی پزیشک بکەیت بۆ چارەسەری ڕشانەوە ئەگەر هەستت بە هەریەکێک لەمانەی خوارەوە کرد:
- بینینی خوێن یان مادەی تۆخ کە لە وردکراوی قاوە دەچێت لە ڕشانەوەدا
- ڕشانەوە کە ڕەنگی سەوز یان زەردی تۆخ بێت
- ئازاری توندی سک یان سنگی لەگەڵدا بێت
- سەرئێشەی توند، سەرگێژە، بێهێزی، یان کەمبوونەوەی هۆشیاری
- تایەکی بەرز یان ڕەقبوونی مل
- نیشانەکانی وشکبوونەوەی لەش وەکوو وشکبوونەوەی دەم، کەمی میز، سەرگێژخواردن، یان لاوازییەکی زۆر
- ڕشانەوەیەکی توند لە منداڵان، بەساڵاچووان یان ئافرەتانی دووگیان
ئاوچنیانی لەش لە منداڵانی بچووک و بەساڵاچووان و ئەو کەسانەدا کە نەخۆشینی بنەڕەتییان هەیە، خێراتر ڕوو ئەدات. هەر بۆیە نابێت بۆ سەردانی پزیشک زۆر چاوەڕوان بیت.
No Comment! Be the first one.