“جەمشید عەزیزخانی” گۆرانیبێژی کرماشانی ماڵئاوایی لە ژیان کرد

چاویارنیوز ـــ “جەمشید عەزیزخانی” گۆرانیبێژ و ئاوازدانەری خەڵکی کرماشان دوای ماوەیەک تووش بوون بە نەخۆشی، لە شاری تاران کۆچی دوایی کرد.

جەمشید عەزیزخانی، لە دایکبووی ساڵی ١٩٥٦ی زاینییە، لە ساڵی ١٩٧٤ بە بەشداریکردن لە کەمپی ڕامسار دەستی بە کاری هونەری کردووە و پلەی یەکەمی لە بەشی گۆرانی وتن بەدەستهێناوە. یەکەمین بەرهەمە فەرمییەکانی بە ناوی “سەفەرنامەی کوردستان” و “ریوار” لە ساڵانی سەرەتای شۆڕشی ئیسلامیدا بڵاو بوونەوە و پێشوازییەکی زۆریان لێکرا.
لە سەردەمی شەڕی سەپێنراوی ئێران و عێراقدا، عەزیزخانی بە ئامادەبوونی چالاکانەی لە ڕادیۆ و تەلەفزیۆنی کرماشان و ناوەندەکانی ڕۆژئاوای وڵات، دەیان بەرهەمی کوردی و فارسی بۆ جەنگاوەران و خەڵکی ناوچە پێشکەش کرد.

ناوبراو لە ماوەی ژیانیدا هەشتسەد پارچە مۆسیقای ناوخۆیی و نیشتمانی بەرهەم هێناوە. ڕۆحی شاد و یادی بەرز بێت.