زیاتر لە ٥٠٠ هەزار هاووڵاتیی عەرەب لە هەولێر نیشتەجێن و زۆرینەیان خاوەن موڵکن

چاویارنیوز – دکتۆر ئارام ڕەفعەت، نووسەر و لێکۆڵەر ڕایگەیاند: زیاتر لە ٥٠٠ هەزار هاووڵاتیی عەرەب لە هەولێر نیشتەجێن و زۆرینەیان خاوەن موڵکن.
نووسەرێک ئاشکرای دەکات، ئێستا ٥٠٠ هەزار هاووڵاتیی عەرەب لە هەولێر نیشتەجێن و زۆرینەیان خاوەن موڵکن، بەڵام دەڵێت؛ چیرۆکی خێزانە کوردەکان لە حەویجە کۆتایی پێهاتووە.
دکتۆر ئارام ڕەفعەت، نووسەر و لێکۆڵەر ئاماژەی بەوە داوە، لە ساڵی ٢٠٠٣ لە هەولێر کەمتر لە ٥٠٠ ماڵی عەرەب هەبوون، بەڵام ئێستا ژمارەیان بە زیاتر لە ٥٠٠ هەزار (نیو ملیۆن) کەس مەزەندە دەکرێت، کە بەهۆی کڕینی خانوو و بازرگانییەوە بوونەتە خاوەن موڵک.
دەشڵێت، تا ساڵی ٢٠٠٣ نزیکەی ٥٠٠ ماڵی کورد لە حەویجەدا هەبوون، بەڵام دوای ڕووخانی ڕژێمی پێشوو، لە ماوەی کەمتر لە مانگێکدا لە ڕێگەی کوشتن و دەرکردن و تاڵانکردنی موڵکەکانیانەوە، تەواوی کورد لەو شارەدا نەهێڵران و چیرۆکیان لەوێ کۆتایی هات.
نووسیویشیەتی، بەهۆی ڕێژەی زاوزێی سەرەوە، ئەم ژمارەیە لە ٢٠ ساڵی داهاتوودا چەند هێندە دەبێتەوە. لێشاوی هاتنی عەرەب کە کۆی گشتییان لە عێراقدا ٣٠ بۆ ٤٠ ملیۆنە، هەڕەشەیەکی بەردەوامە بۆ سەر کۆی باشووری کوردستان.