چاویارنیوز – لە درێژەی گوشارەکانی حکومەتی هەرێمی کوردستان بۆ سەر دەنگە ڕەخنەگرەکان، مامۆستا تاهیر کەلەباشی، کەسایەتی و مامۆستای ئایینیی ناسراو، بەهۆی دەربڕینی ڕەخنەکانی لەسەر دۆخی ژیان و بژێوی خەڵک و گەندەڵی، لە ئەرکی وتارخوێنی و پێشنوێژیی مزگەوت دوورخرایەوە.
مامۆستا تاهیر کەلەباشی لە پەیامێکی تونددا کە لە هەژماری تایبەتی خۆی بڵاوی کردووەتەوە، ڕەخنەی لە سیاسەتی بێدەنگکردنی دەنگە ئازادەکان گرتووە و نووسیویەتی: «ئەم مەملەکەتە پیاوی باش و سەرڕاستی قبووڵ نییە؛ سەرسەری و کچەمۆدێل و عەقڵ‌سڕ بە، کەس حەقی بەسەرتەوە نییە. خەریکی ئادابەکانی دەستنوێژ و تەهارەت بە، کەس کارت پێ ناکات؛ بەڵام کە هاتیتە سەر دزی و نەوت و بەنزین و کارەبا و مەعاش، ئەوە هێڵی سوورە و نابێ ئەو شتانە بۆ خەڵک باس بکرێت.»
ئەم مامۆستا ئایینییە ئاماژەی بەوە کردووە کە دەسەڵات تەنها ئەو وتار و پەیامانەی دەوێت کە بێدەنگن لە ئاست قەیرانەکان، بەڵام هەر کاتێک قسە لەسەر مافە سەرەتایییەکانی خەڵک وەک نەوت، بەنزین، کارەبا و مووچە بکرێت، ڕووبەڕووی سزای کارگێڕی و دوورخستنەوە دەبنەوە.
دوورخستنەوەی ئەم مامۆستایە لە کاتێکدایە کە لە سەردەمی کابینەی نۆیەم بە سەرۆکایەتیی مەسروور بارزانی، ڕێکخراوەکانی مافی مرۆڤ و چاودێرانی سیاسی هۆشداری دەدەن لە زیادبوونی گوشارەکان بۆ سەر مامۆستایانی ئایینی، ڕۆژنامەنووسان و چالاکوانانی کۆمەڵی مەدەنی، بە جۆرێک وەزارەتی ئەوقاف بەردەوام لە ڕێگەی لێژنە و ڕێنماییەکانەوە ڕێگری لەو وتاربێژانە دەکات کە لەسەر مینبەرەوە ڕەخنە لە گەندەڵی و خراپیی کارگێڕیی دەسەڵات دەگرن.
No Comment! Be the first one.