چاویارنیوز – لە درێژەی کاردانەوەکان بەرانبەر به قەیرانی قوولی دارایی و سیاسەتی ئابووریی کابینەی مەسرور بارزانی، ئەندامێکی پەرلەمانی عێراق هێرشێکی توند دەکاتە سەر دەسەڵاتدارانی هەرێم و ڕایدەگەیەنێت کە دۆخی بژێویی خەڵک گەیشتووەتە ئاستێک کە لە زۆرینەی وڵاتە هەژارەکانی جیهان و ئەفریقاش وێنەی نییە، و خەڵک بە تەواوی نائومێد کراوە.
د. موسەننا ئەمین، پەرلەمانتاری کورد لە عێراق، لە لێدوانێکدا ڕەخنەی توندی لە دۆخی ژیان و بژێویی هاووڵاتییانی هەرێمی کوردستان گرت و ئاماژەی بەوە دا: «خەڵکێکی زۆر هەیە کە کۆی مووچەکەی بەشی کڕینی بەرمیلێک نەوت ناکات!» ناوبراو لە چاوپێکەوتنێکدا بەراوردێکی تاڵ دەکات و دەڵێت: «لەم ڕۆژانەدا لە وڵاتێکی هەژاری ئەفریقیدابووم، بەقەد لێرە خەڵک نائومێد نەکراوە.»
ئەم لێدوانە توندە ڕەنگدانەوەی ناڕەزایەتییە قووڵەکانە بەرانبەر به سیاسەتە ئابوورییەکانی حکومەتی هەرێمی کوردستان و قەیرانی بڕین و دواکەوتنی مووچە، لە کاتێکدا دەسەڵاتداران سەرەڕای بێتوانایی لە دابینکردنی پێداویستییە سەرەتاییەکانی وەک سووتەمەنی و بژێوی، سەرقاڵی ململانێی حزبی و پۆستن لە بەغدا، و بەمەش خەڵکی هەرێمیان خستووەتە نێو قەیرانێکی گەورەی دەروونی و ئابوورییەوە.
No Comment! Be the first one.