پاریس سانجێرمان داهاتێکی مێژوویی لە فرۆشتنی یاریزانان، بەدەستهێنا

چاویارنیوز _ پاریس سانجێرمان لە هاوینی 2026دا بە یەکێک  هەمەچەشنترین پەنجەرە گواستنەوەکانی مێژووی خۆی تێپەڕاند.

یانە فەرەنسیەکە بە فرۆشتنی چەند یاریزانێکی گرنگ ژمارەی پێوانەیی خۆی لە داهاتی فرۆشتنی یاریزانان لە یەک بازنەی گواستنەوەدا شکاندووە، ئەوەش دەریدەخات سیاسەتی یانەکە لەم چەند ساڵەی دواییدا چووەتە قۆناغێکی نوێوە.

بەپێی دوایین ڕاپۆرتەکان، کۆی فرۆشی پاریس سانجێرمان دوای گواستنەوەی برادلی بارکولا بۆ لیڤەرپوول نزیکەی 294.3 ملیۆن یۆرۆ بووە؛ ژمارەیەک کە بە بەرزترین داهاتی یانەکە دادەنرێت لە مێژووی یانەکەدا لە فرۆشتنی یاریزانەکان لە یەک هاویندا.

بارکۆلا بوو بە گەورەترین گواستنەوە لە مێژووی پاریس سانجێرماندا، نرخی گواستنەوەی 140 ملیۆن یۆرۆ بوو، لەنێویاندا 116 ملیۆن یۆرۆ بە مەرجی دیاریکراو و 24 ملیۆن یۆرۆ وەکوو پاداشت. ڕیکۆردی پێشووی یانەکە لەلایەن نەیمارەوە بوو، کە لە ساڵی 2023 بە بڕی 90 ملیۆن یۆرۆ پەیوەندی بە یانەی هیلالەوە کرد.

بەڵام بارکۆلا تاکە پارچەی مەتەڵەکە نییە. لەم هاوینەدا پاریس سانجێرمان گۆنچالۆ ڕامۆسی بە میلان فرۆشت بە بەهای 74 ملیۆن یۆرۆ و ڕاندال کۆلۆ مۆانی بە یۆڤانتۆس بە بڕی 41.2 ملیۆن یۆرۆ و لی کانگ ئینی بە ئەتلەتیکۆ مەدرید بە 35 ملیۆن یۆرۆ فرۆشت. هەروەها لە فرۆشتنی کامارا نزیکەی 4.5 ملیۆن یۆرۆی بەدەستهێناوە.

ئامارەکان گۆڕانکارییەکی بەرچاو لە سیاسەتی پاریس سانجێرماندا نیشان دەدەن. یانەیەک کە لە ساڵانی ڕابردوودا بە گرێبەستە بەرزەکانی و گرێبەستە ناودارەکانی ناسراوە، ئێستا زیاتر سەرنجی لەسەر گەنجان و پەرەپێدانی یاریزانانە و فرۆشتنی یاریزانە پێشووەکانییە بەنرخێکی بەرز.

ئەوەی جێگای سەرنجە، دەوترێت پاڵەوانی ئەوروپا بەشێکی بەرچاو لە داهاتی گواستنەوەکانی ئەم هاوینە بۆ گواستنەوەی یاریزانە نوێیەکان خەرج کردووە، یاریزانانێک وەکوو فێران تۆرێس و ماگنوس ئاکێلخۆس و میکا گویدێسیانی هێناوەتە ڕیزەکانی.

پاریس چیتر تەنها ئەستێرەکان ناکڕێت؛ بەڵکوو درووستیان دەکات و دەیانفرۆشێت. گۆڕینی ڕێبازێک کە دەتوانێت مۆدێلی ئابووری پاریس سانجێرمان بۆ ساڵانی داهاتوو بگۆڕێت.