چاویارنیوز – لە ژێر سێبەری هاوکاریی پارتی لەگەڵ سوپای تورکیا؛ بارزانی بۆ هاتوچۆ لە ڕێگاکانی بادینان مۆڵەت لە سوپای تورکیا وەردەگرێت.
سەرچاوەکانی هەواڵ ئاشکرایان کرد کە لقی ١٨ی پارتی دیموکراتی کوردستان (پەدەکە) و ڕێکخەرانی فێستیڤاڵی «بەرواری باڵا» لە سنووری پارێزگای دهۆک لە هەرێمی کوردستان، بۆ هاتوچۆکردن و بەکارهێنانی ڕێگا گەشتیارییەکانی «بەرەسێلە» و «بارۆخ»، ناچار بوون بە فەرمی مۆڵەت لە سوپای داگیرکەری تورکیا وەربگرن.
بەپێی زانیاریی سەرچاوە ئاگادارەکان، سوپای تورکیا تەنها بۆ ماوەی ٣ ڕۆژ مۆڵەتی هاتوچۆی لەو ڕێگایانەدا بە هاووڵاتییان و بەرپرسانی پەدەکە داوە و دوای کۆتاییهاتنی ڕۆژانی فێستیڤاڵەکە، هاتوچۆکردن بەو ڕێگایانەدا وەک پێشوو جارێکی دیکە قەدەغە دەکرێتەوە.
ئەم ڕووداوە لە کاتێکدایە کە ئەو ڕێگایانە بە تەواوەتی دەکەونە ناو خاکی هەرێمی کوردستان، بەڵام بەهۆی پەرەسەندنی داگیرکارییەکانی دەوڵەتی تورکیا و بێدەنگی و هاوکاریی ڕاستەوخۆی بنەماڵەی بارزانی و پارتی، ئێستا هاووڵاتییانی ناوچەکە و تەنانەت خودی بەرپرسانی پەدەکەش لەسەر خاکی خۆیان بەبێ مۆڵەتی کاتیی ئەفسەر و سەربازانی تورکیا ناتوانن لەو ناوچانەدا بسوڕێنەوە.
چاودێران و سەرچاوە خۆجێییەکان ئاماژە بەوە دەکەن کە سنووری بادینان و بەتایبەت ناوچەکانی ئامێدی و بەرواری باڵا، بەهۆی ئۆپەراسیۆنە سەربازییە بەردەوامەکانی دەوڵەتی تورکیا و بەستنی دەیان بنکە و خاڵی پشکنینی سەربازی بە چاوساغی و هاوئاهەنگیی هێزەکانی پەدەکە، بە کردەوە کەوتووەتە ژێر دەسەڵات و حوکمی سەربازیی ئەنقەرە. ئەم دۆخە نەک تەنها بووەتە هۆی چۆڵکردنی سەدان گوند، سووتانی ژینگە و لەدەستدانی سەروەریی نیشتمانی، بەڵکوو ئاستی وابەستەیی و تەسلیمبوونی پەدەکەی لە بەرامبەر سوپای داگیرکەری تورکیادا بە شێوەیەکی ئابڕووبەرانە خستووەتە ڕوو.
No Comment! Be the first one.