لە بازاڕی “شازادەسازی” بۆ بارزانییەکانەوە تا کاروانی کۆچبەرانی کورد لە دەریای ئیجە؛ جیاوازییەکی تاڵ و شەرمهێن!

چاویارنیوز – لە کاتێکدا بەشێک لە سیاسەتمەدارانی عێراق و هەرێمی کوردستان، لە دیمەنێکی ئەرکەوتووانەی سیاسی و چاپلوسیدا، خەریکی نەخشەکێشان بۆ “سەردەمی شازادەکان” و مۆدێلی حوکمڕانیی بنەماڵەیین، هەزاران گەنجی کورد بەهۆی بێکاری و نەبوونی ئاسۆیەکی ڕوون بۆ داهاتوو، لە نێوان شەپۆلەکانی دەریای ئیجە و بیابانەکانی ئەوروپادا گیانیان لە دەست دەدەن.

عەبدوڵڵا خەربیت، کەسایەتیی سیاسیی عێراقی، لە نوێترین لێدوانیدا بەبێ هیچ شەرمێکی سیاسی، ئارین بارزانی وەک “شازادەی داهاتووی عێراق” ناوزەد دەکات. ئەم جۆرە لێدوانانە، کە ڕاستەوخۆ پەرەپێدانی فەرهەنگی “مۆرووسیبوونی حوکمڕانییە”، زیاتر لەوەی پەیامێکی سیاسی بێت، سووکایەتیکردنە بەو بنەما دیموکراتییانەی کە بانگەشەی بۆ دەکرێت. لەم تێڕوانینەدا، هەرێمی کوردستان نەک وەک کیانێکی سیاسی و دیموکراتی، بەڵکو وەک موڵکێکی تایبەتیی بنەماڵەیەک دەبینرێت کە داهاتووەکەی لەناو ژوورە داخراوەکان و لەسەر بنەمای خوێن و نەوەکان دیاری دەکرێت.

پەردەیەک بۆ “شازادەکان”، ئازارێک بۆ گەنجان

ئەوەی جێگەی سەرنج و توڕەییی شەقامە، ئەو جیاوازییە دژوارەیە کە لەنێوان گوتاری فەرمی و واقیعی کۆمەڵایەتیدا هەیە. کاتێک ڕاگەیاندنەکان و لایەنگرانی دەسەڵات خەریکی وێنەگرتن و بەشازادەکردنی نەوەکانی بنەماڵەی بارزانین، لە هەمان کاتدا:

بێکاری: ڕێژەی بێکاری لەنێو دەرچووانی زانکۆ و گەنجانی هەرێم گەیشتووەتە ئاستێکی مەترسیدار، کە دەرەنجامەکەی مایەپووچبوونی توانای مرۆیی وڵاتەکەیە.
کۆچکردن: کاروانەکانی کۆچی گەنجان بەرەو هەندەران، کە بە مەبەستی دۆزینەوەی بژێوی و ژیانێکی کەرامەتمەند بەڕێدەکەون، نیشانەی شکستخواردنی تەواوەتیی ئەو سیستەمەیە کە تەنها خەریکی دروستکردنی “شازادە” و پێگەیاندنی نەوەکانی خۆیەتی.
ئەمە “شازادەسازی”یە، یان “غەدرکردن لە نەوەی داهاتوو”؟

پرسیارەکە ئەوەیە؛ ئایا بەرپرسانی هەرێم و ئەو کەسانەی خەریکی دروستکردنی ئەم جۆرە پڕوپاگەندە سیاسییانەن، کەی سەیری شەقامەکان دەکەن؟ کەی دەبینن کە گەنجی کورد، بە پێچەوانەی ئارین بارزانییەکان، هیچ “شازادەبوونی”یەکی نییە، بەڵکو تەنها گیرۆدەی بێکاری و نادادییەکی چینایەتییە کە لەلایەن هەمان ئەو دەسەڵاتەوە بەسەریدا سەپێنراوە کە ئێستا خەریکی تاج لەسەرنان بۆ نەوەکانی خۆیەتی.

پێدەچێت بۆ بەشێک لە دەسەڵاتدارانی ئێمە، “داهاتووی عێراق” تەنها ئەوە بێت کە کێ لەسەر تەختەکەی ئەوان دادەنیشێت، نەک ئەوەی داهاتووی گەنجانی ئەم وڵاتە چۆن دەبێت و ئایا هیچ گەنجێک لەم وڵاتەدا دەمێنێتەوە تا حکومڕانیی بۆ بکەن، یان دواجار تەنها “شازادەکان” دەمێننەوە و وڵاتەکەش دەبێتە قەڵایەکی چۆڵ لە هاوڵاتیی دڵسۆز!