چاویارنیوز – لە کاتێکدا لە سەرانسەری جیهاندا ئەرکی سەرەکیی پەیامنێر و میدیاکاران بریتییە لە گواستنەوەی ڕووداوەکان و ڕووماڵکردنی بابەتە گرنگەکان بۆ ڕای گشتی، شێوازی کارکردنی هەندێک لە میدیاکارانی کورد ڕووبەڕووی ڕەخنەی توند دەبێتەوە کە تێیدا پەیامنێر لەبری هەواڵ، خۆی دەکاتە چەقی باس و سەرنجەکان.
بەپێی چاودێران و ڕەخنەگرانی بواری ڕاگەیاندن، یەکێک لەو نموونانەی بەردەوام مشتومڕ دروست دەکات، دەرکەوتنەکانی «ڕەحیم ڕەشیدی»یە کە ناسراوە بە «مستەر کورد». ڕەخنەگران ئاماژە بەوە دەکەن کە ناوبراو لە زۆربەی بەشداریکردن و لێدوانەکانیدا، بە پێچەوانەی بنەما باوەکانی کاری ڕۆژنامەوانی، دەبێتە بابەتی سەرەکی و خوودی خۆی دەخاتە پێش زانیاری و ڕووداوەکانەوە.
هاوکات، ڕەخنەی توند ئاراستەی ئەو کەناڵە ئاسمانی و لایەنە حیزبییانەش دەکرێت کە سەکۆ و دەرفەتی بەردەوامیان بەم جۆرە دەرکەوتنانە داوە. چاودێران پێیان وایە ڕێگەدان بە بەردەوامیی ئەم شێوازە، بێڕێزییە بە پێگەی میدیای کوردی و پیشەی ڕۆژنامەوانی دادەنرێت، کە دەبێت هاوشێوەی پزیشکی، ئەندازیاری و مامۆستایی خاوەن پێوەر و پرەنسیپی تایبەت بە خۆی بێت، نەک ببێتە مەیدانێک بۆ کەسانی کەم‌ئەزموون و پێشێلکردنی ستانداردە پیشەییەکان.
No Comment! Be the first one.